ஸ்ரீராமாநுஜரின் உயிர்காத்த பெருமாளும் தாயாரும்!

ஆன்மிகம்

கொலை சதியிலிருந்து ஸ்ரீராமாநுஜரின்

உயிர்காத்த பெருமாளும் தாயாரும்!

ஸ்ரீ ராமாநுஜர்

ஶ்ரீராமாநுஜரை தெய்வப் பிறவி என்று நம்பிய பக்தர்கள் இருந்ததைப் பற்றி நம் அனைவருக்கும் தெரியும். அதே நேரத்தில், அவரைக் கொன்று விடுவதற்குக் காத்திருந்த சிலர் செய்த சதியைப் பற்றித் தெரியுமா?

தெய்விக அவதாரமாகப் பூமியில் ஒருவர் பிறக்கப் போகிறார். அவர் சாதி, சமயம் பாராமல், மானிட ஒற்றுமையை வலியுறுத்துவார். அகிலமெங்கும் ஆன்மிக நெறியைப் பரப்புவார். அவரே ஆதிசேஷனின் மறு அவதாரமான “ஶ்ரீராமாநுஜர்“ என்று அவர் பிறப்பதற்கு இருநூறு ஆண்டுகளுக்கு முன்னரே நம்மாழ்வார் கூறிச் சென்றுள்ளார். அத்துடன், ராமாநுஜரின் வடிவம் இப்படித்தான் இருக்கும் என்று அவர் பிறப்பதற்கு முன்னரே தமது சீடரான மதுரகவி ஆழ்வாரிடம் அளித்தார் நம்மாழ்வார். 

ஶ்ரீபெரும்புதூரில் ஆசூரி கேசவ சோமயாஜிக்கும் காந்திமதி அம்மையாருக்கும் பிள்ளையாக அவதரித்தார் ஶ்ரீராமாநுஜர். இவரது தாய் மாமா திருமலையில் பணிபுரிந்தவர் என்பதால், இவரை `திருமலை நம்பி’ என்று கூறுவர்.

ராமாநுஜரின் மிகப்பெரிய விசுவாசி’ என்றும், `ராமாநுஜரின் நிழல்’ என்றும் அவரின் சீடரான கோவிந்தனைக் கூறுவார்கள்.

ஒருநாள் கோவிந்தன் நந்தவனத்தில் இருந்த பாம்பின் வாயில் கையைவிட்டு, பின்பு நீராடி தம் கடமைகளைச் செய்துகொண்டிருந்ததைக் கண்டறிந்தார் ராமாநுஜர்.

"கோவிந்தா , பாம்பின் வாயில் யாராவது கையை விடுவார்களா? ஒருவேளை அது உன்னைக் கடித்திருந்தால் என்ன செய்வாய்?’’ என்று கடிந்துக்கொண்டார்.

அதற்கு கோவிந்தனோ, "அந்தப் பாம்பின் நாக்கில் முள் குத்திவிட்டதால், வலியில் அவஸ்தைப்பட்டுக்கொண்டிருந்ததைக் கண்டேன். அந்தப் பாம்பின் நாக்கிலிருந்த முள்ளை அகற்றவே அவ்வாறு செய்தேன்’’ என்றார்.

இத்தகைய மனம் படைத்த கோவிந்தன்தான் பின்னாளில் ராமாநுஜரின் உயிரைக் காத்தார்.

ஸ்ரீவைஷ்ணவர்களுக்கே உரிய ஆசார அனுஷ்டானங்களைத் தீவிரமாகக் கடைப்பிடித்த ஸ்ரீராமாநுஜரின் வைஷ்ணவப் பற்றும் பக்தியும் தீவிரமாக வளர்ந்தன. இளவயதில் வேதாந்தக் கருத்துக்களைப் பற்றித் தெரிந்துகொள்வதற்கு ராமாநுஜரும் கோவிந்தரும் குருகுலம் சென்றனர். அங்கிருந்த யாதவ பிரகாஸரின் கருத்துகளைக் கேட்கக் கூட்டம் அலை அலையாக வரும். ராமாநுஜர் வருகைக்குப் பிறகு நடந்த கதையே வேறு. இயற்கைக்குப் புறம்பான கருத்துகளைக் கூறிவந்த யாதவ பிரகாஸரின் கருத்துகளை எதிர்த்து, தம்முடைய கருத்துகளை எடுத்துக்கூறி வந்தார். இதைப் பொறுத்துக்கொள்ள முடியாத யாதவ பிரகாஸர் ராமநுஜரைக் கொல்லச் சதி திட்டம் தீட்டினார்.

`காசிக்குச் செல்லும்போது, கங்கையில் ராமாநுஜரைத் தள்ளிவிடலாம்’ என்று தம் சீடர்களுடன் காசிக்குச் சென்றார் யாதவ பிரகாஸர். இது எப்படியோ கோவிந்தனுக்குத் தெரிந்துவிட, ராமாநுஜரிடம் விஷயத்தைக் கூறி, அந்தக் குழுவில் இருந்து தப்பி ஓடிவிடச் சொன்னார்.
ராமாநுஜரும் தப்பி ஓடி, வழி தெரியாமல் ஒரு காட்டில் நடு இரவில் மாட்டிக்கொண்டார்.

அப்போது காஞ்சி வரதராஜப் பெருமானும், பெருந்தேவி தாயாரும் வேடன் வேடுவச்சியாக வந்து காப்பாற்றி, காஞ்சியில் கொண்டுவந்து அவரைச் சேர்த்தார்கள்.

தக்க சமயத்தில் இந்த உதவியை கோவிந்தன் செய்யாவிட்டால், ராமாநுஜர் நமக்குக் கிடைத்திருப்பாரா? உலகமே கண்டிராத வகையில் நூற்றி இருபது ஆண்டுகள் பூவுலகில் உடல்நலம் சிறிதளவும் குன்றாமல் வாழ்ந்தவர்.

ஸ்ரீராமாநுஜரின் ஜீவிய காலத்திலேயே அவரது விக்கிரகங்களும் சிலைகளும் சிஷ்யர்களால் தயாரிக்கப்பெற்று பல்வேறு இடங்களில் பிரதிஷ்டை செய்யப்பட்டன. அவற்றில் ஸ்ரீரங்கம் - 'தானான திருமேனி’, மேல்கோட்டை - 'தானுகந்த திருமேனி’, ஸ்ரீபெரும்புதூர் - 'தமர் உகந்த திருமேனி’ ஆகிய மூன்று விக்கிரகங்களையும் ஸ்ரீராமாநுஜரே தழுவி, தமது ஆசிகளோடு அளித்தார்.

இப்போது ஆயிரம் ஆண்டுகள் ஆகிவிட்டன. நம்மால், கண்களால் காண இயலாவிட்டாலும், இன்றும் நம்முடன் வாழ்ந்துகொண்டிருக்கிறார் ஸ்ரீராமாநுஜர்....!

நன்றி - ஆனந்த விகடன்

Published Date : 30-04-2017 15:48:32

ஹெல்த்

மாம்பழம் 360 டிகிரி! வகை, சுவை, சாப்பிடும் முறை, பலன்கள்! #Mango360

Last Updated : 30-04-2017 18:42:48

- ச.மோகனப்பிரியா

பழங்களின் அரசன் மாம்பழம்! அதனால்தான் தமிழர்கள், முக்கனிகளில் இதற்கே முதல் இடம் கொடுத்தார்கள். அதிகச் சுவையானது; மருத்துவக் குணம் நிறைந்தது; அனைவரையும் சப்புக்கொட்டி சாப்பிடவைப்பது... மொத்தத்தில் அனைவரையும் ருசியில் மயங்கவைக்கும் மந்திரப்பழம், மாம்பழம்! உலக அளவில் மாம்பழத்துக்கு மவுசு அதிகம். காரணம், இதன் சுவைக்கு உலகின் மூலை, முடுக்கிலெல்லாம் ஏராளமான ரசிகர்கள். சரி, மாம்பழத்தை எப்படிப் பார்த்து வாங்குவது, உண்பது, அதன் பலன்கள் என்னென்ன? விரிவாகப் பார்க்கலாம். 

"95 சதவிகிதம் மாம்பழங்கள் கல்வைத்துப் பழுக்கவைக்கப்படுகின்றன. அதாவது, வெள்ளை நிறத்தில் இருக்கும் கால்சியம் கார்பைடு (Calcium Carbide) கற்களை இதற்குப் பயன்படுத்துகிறார்கள். அதோடு, இந்தக் கற்களைப் பொடியாக்கி, ஸ்ப்ரே போலவும் பயன்படுத்துகிறார்கள். இந்த ஸ்ப்ரேக்கள் அடிக்கப்பட்ட மாம்பழங்கள் பளபளவென இருக்கும். அதனால், பழத்தில் இயல்பாக இருக்கும் கறுப்பு நிறப் புள்ளிகள் தென்படாது. இப்படி கற்கள், பவுடர் பயன்படுத்தப்பட்டால், மாம்பழத்தில் இருக்கும் சத்துகள் குறைந்துவிடும்’’ என்கிறார் பெரியகுளத்தைச் சேர்ந்த விவசாயி மகாலிங்கம். மேலும், மாம்பழங்களை இயற்கையாகப் பழுக்கவைக்கும் முறை பற்றியும் விளக்குகிறார். 

“இயற்கையான முறையில் மாம்பழத்தைப் பழுக்கவைக்க வைக்கோல், ஊதுவத்தி, பேப்பர் ஆகியவையே போதுமானவை. வீட்டில் உள்ளவர்கள், குறைந்த அளவுக்குத்தான் மாங்காய்களை வாங்குவார்கள். அவற்றை பேப்பரில் சுற்றிவைத்து, ஓர் அட்டைபெட்டியில் போட்டு, ஊதுவத்தி ஏற்றிவைக்க வேண்டும். அதன் புகை அந்தப் பெட்டிக்குள்ளேயே இருக்கும்படி காற்றுப் புகாதவாறு மூடிவைக்க வேண்டும். இரண்டு நாள்களில் மாங்காய்கள் பழுத்துவிடும். பச்சையாக, கடினமான காயாக இருந்தால், பழுக்க இரண்டு நாள்கள் தேவைப்படும்; சற்றுப் பழமாக இருந்தால் ஒரு நாள் போதுமானது.’’

மாம்பழங்களை எப்படிப் பார்த்து வாங்குவது, வாங்கிய பின்னர் எப்படிப் பயன்படுத்துவது என்று சென்னையில் 'லோக்கோ ஃப்ரூட்ஸ்' பழக்கடை வைத்திருக்கும் டி.அமீத் கான் விளக்குகிறார்... 

எப்படிப் பார்த்து வாங்குவது?

தேங்காயைத் தட்டிப் பார்த்து வாங்குவதுபோல, மாங்காயையும் தட்டிப் பார்த்துதான் வாங்க வேண்டும். அனைத்து வகைப் பழங்களையுமே தட்டிப் பார்த்து வாங்கலாம். தட்டும்போது சத்தம் சற்று குறைந்திருந்தாலோ, சத்தம் கேட்காமலேயே இருந்தாலோ அழுகியது அல்லது அதிகம் கனிந்தது என்று அர்த்தம்.

வாங்கும்போது, நிச்சயம் கவனிக்கவேண்டிய ஒரு விஷயம், பழத்தில் இருக்கும் கறுப்பு நிறப் புள்ளிகள். இவை இல்லாத பழங்கள், ஆபத்தானவை; செயற்கை முறையில் கனியவைக்கப்பட்டவை. கறுப்பு புள்ளிகள் உள்ள பழங்களில்தான் சுவை அதிகமாக இருக்கும். அவைதான் ஒரிஜினல்!

மாம்பழத்தின் உள்ளே காணப்படும் ஆரஞ்சு மற்றும் சிவப்பு கலந்த நிறம் இயற்கையானது. வெறும் மஞ்சள் நிறச் சதையுள்ள பழம் என்றால், அது ரசாயனம் மூலம் செயற்கையாக பழுக்கவைக்கப்பட்டது எனப் புரிந்துகொள்ளலாம். 

சாப்பிடும் முறை:

* எந்தப் பழமாக இருந்தாலும், அதை இரண்டு மணி நேரம் தண்ணீரில் ஊறவைத்து நன்கு கழுவ வேண்டும். இப்படிச் செய்தால், பழத்தின் மேல் இருக்கும் ரசாயனம், பூச்சி மருந்து அனைத்தும் நீங்கிவிடும். 

* பழங்களை தோல் சீவிச் சாப்பிட வேண்டும். தோலில் சத்துக்கள் இருக்கும் என்பார்கள்; ஆனால், அதே தோலில்தான் அதை பழுக்கவைக்க அடிக்கப்படும் மருந்துகளும் நிறைந்து இருக்கும். எனவே, கடைகளில் கிடைக்கும் பழங்களின் தோலை நீக்கிவிட்டுச் சாப்பிடுவதே சிறந்தது.

 * மாம்பழங்களைத் தோல் சீவி சாப்பிடுவதால், உடல் உஷ்ணம் குறையும். வயிற்றில் அசௌகரியம் உண்டாகாமல் இருக்கும். வயிற்று வலி ஏற்படாது. 

* மல்கோவா, அல்போன்சா, ருமேனியா, பங்கனபள்ளி, இமாயத் போன்ற வகை மாம்பழங்களை சாறாகக் குடிக்கலாம். செந்தூரம், கல்லா, நார் மாம்பழம், மனோரஞ்சிதம், காளையபாடி, காசா போன்றவற்றை அப்படியே சாப்பிடலாம்.

எந்த வகை மாம்பழம் எங்கு ஃபேமஸ்!

* மாம்பழம் என்றாலே முதலில் நினைவுக்கு வருவது சேலம்தான். தமிழ்நாட்டில், அனைத்து வகையான மாம்பழங்களும் கிடைக்கும் இரண்டு ஊர்கள், சேலம் மற்றும் பெரியகுளம். 

* வட தமிழகம் முழுவதற்கும் சேலத்தில் இருந்துதான் அனைத்து வகை மாம்பழங்களும் சப்ளை செய்யப்படுகின்றன. தென் தமிழகத்துக்கு பெரியகுளத்தில் இருந்து வருகின்றன.

* இப்போது ஆந்திராவும் இந்தப் பட்டியலில் இடம் பெற்றுவிட்டது. அல்போன்சா, மல்கோவா, பங்கனபள்ளி போன்ற மாம்பழங்கள் அதிக அளவில் ஆந்திராவில் விளைவிக்கப்படுகின்றன. 

வகைகளும் சுவைகளும்!

மாம்பழத்தில் 100-க்கும் மேற்பட்ட வகைகள் உள்ளன. முக்கியமான சில மாம்பழங்கள்... செந்தூரம், காளையபாடி, அல்போன்சா, மனோரஞ்சிதம், நாட்டுக்காய், மல்கோவா, காசா, ஊறுகா காய் (கிளி மூக்கு மாம்பழம்), பங்கனபள்ளி, நார் மாம்பழம் (நீலம் மாம்பழம்), கல்லா மாங்காய், ருமேனியா, இமாயத் (இமாம் பசந்தி).

* இமாயத் வகை அதிக இனிப்புச் சுவை கொண்டது; புளிப்பு இல்லாதது.

* அல்போன்சா, பங்கனபள்ளி, காசா, செந்தூரம், மனோரஞ்சிதம், ருமேனியா போன்றவை குறைந்த அளவிலான புளிப்பும் அதிக இனிப்பும் கொண்டவை.

* நார் மாம்பழம், காசா, காளையபாடி போன்றவற்றில் புளிப்பும் இனிப்பும் சம அளவில் இருக்கும். 

* கல்லா, நாட்டுக்காய், கிளிமூக்கு மாம்பழம் போன்றவை அதிக புளிப்புச் சுவையுடன் இருக்கும். 

பலன்கள்:

* வாதம் மற்றும் பித்தத்தைப் போக்கும். 

* இதில் அதிக அளவில் இருக்கும் கரோட்டின் சத்து, பார்வைத்திறனை மேம்படுத்தும். கண் நோய்களில் இருந்து காக்கும். 

* மாம்பழத்தில் வைட்டமின் ஏ, சி மற்றும் இரும்புச்சத்து நிறைந்துள்ளன. ரத்தச்சோகையைச் சரிசெய்யும். 

* மாம்பழத்தை மில்க்‌ஷேக்காக சாப்பிடக் கூடாது. ஜூஸாகக் குடிக்கலாம். 

* நோய் எதிர்ப்பு சக்தியை அதிகரிக்கும்.

* இதில் நார்ச்சத்து, வைட்டமின்கள், கனிமங்கள், பாலிபீனால் ஃபிளேவனாய்டுகள் போன்றவை நிறைந்துள்ளன. இவை, குடல், மார்பகம் மற்றும் புராஸ்டேட் புற்றுநோய்களுக்கு எதிராகப் போராடும் சக்தியை நம் உடலுக்கு அளிப்பவை. ஆக, மாம்பழம் நல்லது!
 

Published Date : 30-04-2017 10:55:27

வைரல் கார்னர்

குழந்தைகளின் உடல் வளர்ச்சி ரகசிய தொடுதல் பற்றியெல்லாம் அவர்களிடம் பேசியிருக்கிறீர்களா?

Last Updated : 26-04-2017 21:37:05

- ஶ்ரீதேவி.கே

குழந்தைகளின்  மீது நடத்தப்படும் பாலியல் வன்கொடுமையை நினைத்தாலே மனதில் ஒரு எரிமலை வெடித்து குமுறுகிறது. இதை எப்படியாவது தடுத்தாக வேண்டும் என மனம் பரபரக்கிறது. ஆனால் இதை எப்படிச் செய்வது என்ற குழப்பம் பெற்றோருக்கு. பாலியல் பாதுகாப்பு தொடர்பான விஷயங்களை குழந்தைகளிடம் எந்த வயதில் எப்படி ஆரம்பிப்பது என்பதே குழப்பத்துக்கு காரணம். குழந்தைகளின் உடல் வளர்ச்சி, ரகசிய தொடுதல் பற்றியெல்லாம் அவர்களிடம் பேசியிருக்கிறீர்களா?

This article will continue after this advertisement

* குழந்தைகளுக்கு அவர்கள் உடல் உறுப்புகளின் பெயர்களை அறிமுகம் செய்ய வேண்டும். குழந்தைகளின் பிரைவேட் பார்ட் எனப்படும் அந்தரங்க உறுப்புகளின் பெயரை நாம் சொல்வதில்லை. ஒரு வேளை அந்த உறுப்பில் பாதிப்பை குழந்தைகள் சந்திக்கும்போது அதை தெளிவாகவும், முழுமையாகவும் சொல்லத் தெரியாமல் போகலாம். பிரச்னை முழுமையாக வெளியில் தெரியாமல் போவதால் பாதிக்கப்படுவது குழந்தைகளே. உடல் உறுப்புகளின் பெயர்களை சொல்லித்தருவதில் தயக்கம் வேண்டாம்.

* எதெல்லாம் அந்தரங்க உறுப்புகள் என்ற தெளிவை குழந்தைகளிடம் ஏற்படுத்துங்கள். அந்த உறுப்புகளை மற்றவர்கள் பார்க்கக் கூடாது. அம்மாவும் அப்பா மட்டுமே குறிப்பிட்ட வயது வரை பார்க்கலாம். மருத்துவரிடம் மருத்துவ காரணங்களுக்காக மட்டுமே அந்தரங்க உறுப்புகளைக் காட்டலாம். அதுவும் பெற்றவர்கள் முன்னால் மட்டுமே. மற்ற யாரும் அந்தப் பகுதிகளை தொடவோ, பார்க்கவோ அனுமதிக்கக் கூடாது என்பதை விளக்குங்கள்.

* உங்கள் குழந்தையிடம் உடலின் எல்லை எது என்று கற்றுக் கொடுங்கள். குழந்தையின் உடலை வெளி நபர்கள் எந்த எல்லை வரை என்ன காரணங்களுக்காக தொடலாம் என்பதை குழந்தைகளுக்கு உணர்த்துங்கள். வேறு யாராவது குழந்தைகளின் பிரைவேட் பார்ட்டை தொட முயற்சிக்கின்றனரா என்றும் கேட்டுத் தெரிந்து கொள்ளுங்கள். 

* பாலியல் தொந்தரவுகள் என்பவை ரகசியங்கள் அல்ல. அவற்றை மனம் திறந்து சொல்ல வேண்டும் என்பதைப் புரிய வைக்கலாம். பாலியல் சீண்டல்களுக்கு உள்ளாகும் குழந்தைகள் இதை வெளியில் சொன்னால் தன்னை தவறாக நினைப்பார்கள் என்ற எண்ணத்தில் யாரிடமும் சொல்லாமல் விடுகின்றனர். மேலும் குழந்தைகளை பாலியல் தொல்லைகளுக்கு உள்ளாக்கும் நபர்கள் ‘‘நானும் நீயும் ரகசியமா விளையாடப் போறோம் இதை யாரிடமும் சொல்லிடாத. அப்புறம் உனக்கு தான் பிரச்னை வரும்,’’ என்று குழந்தைகளை அச்சுறுத்துகின்றனர். குழந்தைகள் இது போல யாராவது சொன்னால் அவர்களை அடையாளப்படுத்த வேண்டும் என்பதை கற்றுக் கொடுங்கள். 

* அந்தரங்க உறுப்புகளை யாரும் எந்த காரணத்துக்காகவும் புகைப்படம் எடுக்கக் கூடாது. இது பற்றி பெரும்பாலான பெற்றோர் குழந்தைகளுக்கு கற்றுக் கொடுப்பதில்லை. குழந்தைகளை நிர்வாணமாக படம் எடுப்பது மற்றும் அந்தரங்க உறுப்புகளை படம் எடுப்பதும் அவர்களுக்கு தொந்தரவை ஏற்படுத்தும் என்று புரிய வையுங்கள். இதுபோன்ற செயல்களுக்கு யாரையும் அனுமதிக்கக் கூடாது. 

* பாதுகாப்பற்ற அல்லது நெருக்கடியான சூழலில் சிக்கிக் கொள்ளும்போது என்ன செய்ய வேண்டும் என்பதை அவர்களுக்கு கற்றுக் கொடுக்க வேண்டும். வயதானவர்கள் மற்றும் இளம் வயதினர் குழந்தைகளின் அந்தரங்க உறுப்புகளை பார்ப்பது மற்றும் தொடுவது போன்ற அசெளகரியமான சூழலில் அங்கிருந்து வெளியேறிவிட வேண்டும் என்பதைக் கட்டாயம் உணர வைக்கலாம். 

* பாதுகாப்பற்ற சூழலை மற்றவர்களுக்கு உணர்த்துவதற்கான ‘கோடு வேர்டை’ உங்கள் குழந்தைகளுக்கு சொல்லிக் கொடுங்கள். எப்போதெல்லாம் பாதுகாப்பற்ற உணர்வை அடைகிறார்களோ அப்போதெல்லாம் அந்த வார்த்தையை பயன்படுத்த வேண்டும். வீட்டில் இருக்கும் போதோ, உறவினர்கள் மத்தியில் இருக்கும் போதோ குழந்தை இந்த வார்த்தையின் மூலம் பெற்றோருக்கு தனது பிரச்னையை உடனடியாக உணர்த்தலாம். தூங்கும் போதும், விளையாடும் போதும் அவர்கள் அசவுகரியமாக உணர்ந்தால் இந்த வார்த்தையை பயன்படுத்தப் பழக்குங்கள். 

* பிரச்னை எதுவும் ஏற்படாத பட்சத்திலும் குழந்தைகள் தனது உடலில் ஏற்படும் மாற்றங்களைப் பகிர்ந்து கொள்ளச் செய்யுங்கள். பருவ மாற்றத்தின் காரணமாக அவர்கள் உடலில் தானாக உணரும் மாற்றங்களையும் மனம் விட்டுப் பேச வாய்ப்புக் கொடுங்கள். அப்போது தான் உடல் பற்றிய ரகசியக் கூச்சம் விடுபடும். பிரச்னை வரும்போது தயங்காமல் குழந்தைகள் வெளிப்படுத்த பழகும். 

* நல்ல தொடுகை, கெட்ட தொடுகை என்பதைவிட ரகசியமாகத் தொடுகை எது என்பதைக் குழந்தைகள் புரிந்து கொள்ளச் செய்யுங்கள். வெளி நபர்கள் அந்தரங்க உறுப்புகள் பற்றிப் பேசுவது மற்றும் அவற்றை ரகசியமாக தொட முயற்சிக்கும்போது குழந்தைகள் அலர்ட் ஆக இந்த வார்த்தை பயன்படும். 

* தன் உடல் மற்றும் தொடுகை சார்ந்த விழிப்பு உணர்வு சக குழந்தைகளோடு இருக்கும்போதும் பின்பற்ற வேண்டும். மோசமான எண்ணத்தோடு அணுகுபவர்கள் முதலில் குழந்தைகளின் நண்பர்களாகியே பின்பு தங்களது உண்மை முகத்தை வெளிப்படுத்துகின்றனர். அவர்களுக்கு பிடித்தவர்கள், நண்பர்கள், ஆசிரியர், பயிற்சியாளர் என்று யாராக இருந்தாலும் அந்தரங்க உறுப்புகளை தொட அனுமதிக்கக் கூடாது என்பதை குழந்தைகளுக்கு புரிய வைப்பது பெற்றோரின் கடமை. 

- யாழ் ஸ்ரீதேவி 

Published Date : 26-04-2017 17:56:30

விவசாயமும் போராட்டமும்

தமிழ்நாடு

விவசாயிகள் போராட்டக்காரர்களாயினர்?

தமிழக விவசாயிகளின் நிலை

இந்தியாவின் தலைநகரமான தில்லியில் உள்ள ஜந்தர் மந்தர் பகுதியில் தேசிய தென்னிந்திய நதிகள் இணைப்பு விவசாயிகள் சங்கத்தின் தலைவர் அய்யாக்கண்ணு தலைமையில் விவசாயிகள் பலரும் போராடிவந்தனர். பல்வேறு நிலையில் அவர்களது போராட்டம் இருந்தது. ஒவ்வொருநாளும் அவர்களது போராட்ட நிலையையும் நிகழ்வையும் பார்க்கும் ஒவ்வொரு மனிதர்களுக்கும் உயிரை அறுக்கும் விசயமாகவே அது இருந்தது. ஒருநாள் முழுநிர்வாணப் போராட்டம், மறுநாள் சிறுநீர் அருந்தும் போராட்டம், பெண் வேடம் தரித்து வளையல், பூ உதிர்த்து விதவைக்கோலப் போராட்டம் என அவர்கள் போராட்டம் உலகத்தில் உள்ள அனைவரையும் ஈர்த்து அவர்கள்பால் உவகைகொள்ளச் செய்தன. ஆயினும், அவர்கள் போராடச் சென்ற நோக்கம் முழுமையாக நிறைவேறவில்லை.

வீரமிகுந்த எங்க தாத்தா

அவர்களது போராட்டம் தற்சமயம் அதாவது 41 நாள் கழித்தபின் ஒத்திவைப்பதாகச் சொல்லிவிட்டு அவர்கள் நம் ஊர்நோக்கிப் பயணப்பட்டனர். சென்னை சென்ட்ரல் ரயில் நிலையத்தில் வந்திறங்கிய அய்யாக்கண்ணு தலைமையிலான விவசாயிகளை வரவேற்க இளைஞர்கள், பொதுமக்கள் எனப் பலர் திரண்டிருந்தனர்.

அப்போது பத்திரிகையாளர்களிடம் பேசிய அய்யாக்கண்ணு (போராட்டத் தலைவர்) "விவசாயக் கடன் தள்ளுபடி, காவிரி மேலாண்மை வாரியம் அமைத்தல் உள்ளிட்ட கோரிக்கைகளை வலியுறுத்தி தில்லியில் நாங்கள் போராட்டம் நடத்தி வந்தோம். 'எப்படியாவது மோடி (நாட்டின் பிரதமர்) எங்களின் குறைகளைக் கேட்கமாட்டாரா?' என்ற எண்ணத்தில் இருந்தோம். ஆனால், அவர் எங்களைச் சந்திக்க வரவில்லை. அதனால் எலிக்கறி உண்ணுதல், மொட்டை அடித்தல், நிர்வாணப் போராட்டம் செய்தோம். இறுதிவரை அவர் எங்களைச் சந்திப்பதைத் தவிர்த்தே வந்தார்.
 இந்த போராட்டத்தை எப்படியாவது கலைக்க வேண்டும், எங்களை ஊருக்கு அனுப்பவேண்டும் என்பதில் அவர்கள் குறியாக இருந்தனர். அதனால் எங்களுக்கு எந்த அளவுக்குக் கஷ்டம் கொடுக்க முடியுமோ? அந்த அளவுக்கு இன்னல்கள் கொடுத்தனர்.

நாங்கள் இருந்த பகுதியில் ஒரு நபர் கொலை செய்யப்பட்டு சாலையில் கிடந்தார். அந்த கொலை வழக்கை எப்படியாவது எங்கள் மேல் சுமத்துவதற்கான நாடகமும் நடந்தது. அரசியல்வாதிகள் மற்றும் காவலர்களின் மிரட்டல்களும் அதிகமாக இருந்தது. ஆனால், நாங்கள் யாரும் பயப்படவில்லை. தமிழக விவசாயிகளுக்கு நல்லது நடக்க வேண்டும் என்ற ஒரே எண்ணத்தில் நாங்கள் போராடி வந்தோம்.

கடந்த ஞாயிற்றுக்கிழமையன்று தமிழக முதல்வர் பழனிசாமி (அப்போதுதான் இவருக்கு அவர்களைப் பற்றி ஞாபகம் வந்ததுபோல) எங்களை வந்து சந்தித்தார். அப்போது அவர் 'உங்களை மோடியுடன் பேசுவதற்கு நான் அழைத்துச் செல்கிறேன்' என்றார். ஆனாலும் முடியவில்லை. கடைசியாகத் 'தமிழக அரசால், உங்களுக்கு என்னென்ன சலுகைகள் தர முடியுமோ அந்த அனைத்து சலுகைகளையும் நான் செய்து தருகிறேன். தயவு செய்து போராட்டத்தைக் கைவிடுங்கள்' என்றார். அதனால் அந்தப் போராட்டத்தைத் தற்காலிகமாக கைவிட்டிருக்கிறோம். ஆனால், விவசாயிகளுக்கு மாநில அரசும், மத்திய அரசும் எந்த ஒரு நல்ல முடிவையும் எடுக்கவில்லை என்றால் மீண்டும் போராட்டத்தில் ஈடுபடுவோம். அந்தப் போராட்டம் மிகப்பெரிய அளவில் நடக்கும்." என்றார். 

பழுத்த இலையோடு ஒரு துளிர்

போராட்டத்தில் ஈடுபட்ட பிரகாஷ் என்ற இளைஞர், "விவசாயிகளுக்கு ஆதரவு குரல் கொடுக்கவே நான் தில்லிக்குச் சென்றேன். அங்கு நம் விவசாயிகளின் போராட்டம் தீவிரமடையவே நானும் போராட்டத்தில் கலந்துகொண்டேன். நமது விவசாயிகளுக்கு விரைவில் நன்மை நடக்க வேண்டும். இல்லையென்றால், மீண்டும் இளைஞர்களை ஒன்று திரட்டி டெல்லியில் மிகப்பெரிய போராட்டம் செய்வோம். ஜல்லிக்கட்டுக்காக ஒன்று கூடிய நம் இளைஞர்கள் கண்டிப்பாக விவசாயிகளுக்காகவும் ஒன்று கூடுவார்கள். மத்திய, மாநில அரசுகள் தமிழக விவசாயிகளுக்கு நல்ல முடிவு எடுக்கவில்லை என்றால், விரைவில் தில்லியே அதிரும்படியான மிகப்பெரிய போராட்டம் நடக்கும். நம்ம விவசாயிகளுக்கு ஏதாவது ஒரு பிரச்சினை என்றால் இளைஞர்கள்தான் முதலில் முன்வர வேண்டும்." என்றார்.

இந்தியாவின் முதுகெலும்பு? 

"தமிழக விவசாயிகள் மட்டுமல்ல... அனைத்து மாநில விவசாயிகளையும் மத்திய அரசு ஏமாற்றி வருகிறது. இதை தில்லியில் போராடியபோது தான் தெரிந்துகொண்டேன். மற்ற மாநில விவசாயிகளும் எங்களுடன் போராடுவதற்குத் தயாராக இருந்தனர். எங்களுக்கு முழு ஆதரவையும் அவர்கள் கொடுத்து வந்தனர். தமிழ் மக்கள் மட்டுமல்ல... தினம்தினம் பல மாநில விவசாயிகளும் எங்களைச் சந்தித்து ஆதரவு தருவதாகச் சொன்னார்கள்.

சில நாட்களுக்குமுன் பஞ்சாப்பிலிருந்து ஒரு விவசாய குழு ஒன்று வந்தது. உங்களின் போராட்டம் வரவேற்கத்தக்கது. உங்கள் மனதைரியத்தைப் பாராட்டுகிறோம். இந்த நேரம் எங்களுக்கு அறுவடை காலம் என்பதால் எங்களால் உங்களுடன் சேர்ந்து போராட முடியவில்லை. இன்னும் சில தினங்களில் அறுவடை முடிந்துவிடும். அதன்பின் எங்கள் விவசாயிகளும் உங்களுடன் இணைந்து போராடுவார்கள். இதைச் சொல்வதற்கே இங்கு வந்தோம்'' என்றார்கள். அதேபோல் பல விவசாயிகள் எங்களுக்கு முழு ஆதரவையும் கொடுத்தார்கள்.

ஒரு நாட்டில் வீரர்கள் போராடலாம் - விவசாயிகள் போராடலாமா?
நிமர்ந்து நிற்கச் செய்வது முதுகெலும்பு
அதுவே வளைந்தோ, உடைந்தோ விட்டால் மனிதர்களின் நிலை?

நாட்டின் முன்னேற்றம் விவசாயிகளின் கையிலுள்ளது. அல்லது ஒரு நாட்டின் அடையாளம் விவசாயிகள் என்றார்கள் நம் முன்னோர்கள். அவர்களையே அடையாளம் கண்டுகொள்ளாத அரசாங்கம், அவர்களது வாழ்வைப் எப்போது மகிழ்ச்சியடையச் செய்யும்? நாட்டின் பஞ்சபாடு எப்போது நீங்கும்?

ஆட்சியை மட்டும் காக்கத் துடிக்கும் அரசியல்(வாதிகள்)

மத்திய அரசு எங்களுக்கு நல்ல முடிவை எடுக்காவிட்டால் விரைவில் மிகப்பெரிய போராட்டம் டெல்லியில் வெடிக்கும். அப்போது தமிழக விவசாயிகளுடன் பல மாநில விவசாயிகளும் கலந்துகொள்வார்கள். விவசாயிகள் நலன் காக்க இந்திய அரசு உடனே நல்ல முடிவை எடுக்க வேண்டும். இனி அடுத்தடுத்த போராட்டங்கள் நடைபெறும்போது நான் முதல் ஆளாக வருவேன். எனக்கு வயது ஒரு தடையே இல்லை." என்கிறார் 87 வயதான சம்மந்தம் என்ற தாத்தா.

அமரஜோதி என்ற பெண் நம்மிடம் பேசியபோது "பல நாட்கள் போராட்டம் நடத்தினோம். ஆனால், மோடி எங்களை வந்து சந்திக்கவே இல்லை. பலவிதமான போராட்டங்கள் செய்தோம். எங்களைக் கலைக்க நினைத்தார்களே தவிர யாருமே பேச முன்வரவில்லை. அந்த ஊர் மக்கள் எங்களுக்கு அனைத்து விதமான உதவிகளையும் செய்து வந்தார்கள். விவசாயிகளுக்கு ஏதாவது நல்லது செஞ்சா புண்ணியமா போகும்" ஒருவித கனத்த இதயத்தோடு தெரிவித்தார்.

இடுப்பில் ஒரு கோவணமும், தோளில் ஒரு துண்டையும் மட்டுமே உடுத்தி வந்த அனைத்து விவசாயிகளுக்கும், 'எப்படியாவது தமிழக விவசாயிகளுக்கு நல்லது நடந்துவிடாதா?' என்ற ஏக்கம் மட்டுமே மிச்சமிருந்தது.

நன்றி - ஆனந்த விகடன்

Published Date : 25-04-2017 18:49:19

விடுமுறைக்கான தோழன்..! அரசுப் பள்ளியின் ‘செம’ ஐடியா

Last Updated : 24-04-2017 22:04:56

- இ.கார்த்திகேயன்

’’பள்ளிக்கூடம் லீவு விட்டாச்சு. இனி ஜாலிதான்’’னு எல்லா மாணவர்களும் ஜாலி மூடில் இருக்க.. விருதுநகர் மாவட்டம் சத்திரரெட்டியாபட்டி, அரசுமேல்நிலைப்பள்ளி மாணவர்களில் 100 பேருக்கு மரக்கன்றுகளை கொடுத்து விடுமுறையில் தண்ணீர் ஊற்றி பராமரித்து பள்ளிக்கு வரும்போது பத்திரமாகக் கொண்டுவந்து நடச் சொல்லி விடுமுறையில் மரக்கன்று வளர்க்கும் பணியைக் கொடுத்திருக்கிறார் இப் பள்ளியின் தலைமையாசிரியர் மோகன்.

பள்ளித்தலைமையாசிரியர் மோகனிடம் பேசினோம்,‘’ அமெரிக்காவில் வசிக்கிற தமிழர்களில் சுற்றுபுறச்சூழலில் அக்கறை கொண்டவர்கள் இணைந்து ’யுனேட்டட் தமிழ் பவுண்டேசன்’னு ஒரு அமைப்பை ஏற்படுத்தியிருக்காங்க. அதோட நோக்கமே மண், மரம், மழை ஆகியவற்றைக் பாதுகாக்கணும்னு என்பதுதான். அதாவது பாஸ்ட்புட் தவிர்த்து மண்ணில் விளையும் இயற்கை விவசாய உணவுப்பொருளை உண்ண ஊக்குவிப்பது, மரக்கன்றுகளை அதிகளவில் நடுவது, மழைநீரைச் சேமித்து வைப்பது இதுதான். இந்த அமைப்பு தமிழ்நாடு முழுவதும் உள்ள பள்ளிகளில் மரக்கன்றுகளை நட்டு அதை மாணவர்களையே பராமரிக்கச் செய்யவேண்டும்னு பள்ளிகளில் மரம் வளர்க்கும் திட்டத்தை தொடங்கியிருக்காங்க. அதன்படி, விருதுநகர் மாவட்டத்தில் முதலில் எங்க பள்ளியிலதான் அமல்படுத்தணும்னு சொன்னாங்க. இந்த பவுண்டேசனின் உதவியோடு வனத்துறையிடமிருந்து 70 வேம்பு மற்றும் 30 புங்கன் என மொத்தம் 100 மரக்கன்றுகளை வாங்கி நடலாம்னு முடிவுசெய்தோம். ஆனால், ஏப்ரல் 21-ம் தேதியோட எல்லா மாணவர்களுக்கும் தேர்வு முடிஞ்சு லீவு விட்டுடுவோம்.. மரக்கன்றுகளை நடமுடியாது, அப்படியே நட்டாலும் நட்டவுடனே விடுற உயிர்நீரோட மாணவர்கள் வீட்டுக்குப் போயிடுவாங்க. ஒன்றரை மாசம் லீவு முடிஞ்சு ஜூன் மாதம் பள்ளிக்கூடம் தொறந்ததும் வந்துப்பார்த்தா நூற்றுக்கு நூற்று மரக்கன்றுகளும் ஒன்னுபோல பட்டுப்போயிருக்கும். அதனால பள்ளி ஆசிரியர்களிடம் பேசி ஒரு முடிவெடுத்தோம்.

எங்க பள்ளியில படிக்குற 6-ம் வகுப்பு, 8-ம் வகுப்பு மாணவ, மாணவிகள் 150 பேரில், விடுமுறைல அவரவர் சொந்த ஊருக்குப் போகும் மாணவர்கள் எண்ணிக்கையை கழிச்சுட்டு 100 மாணவ, மாணவிகளுக்கு ஆளுக்கு ஒரு மரக்கன்றை கொடுத்து, இந்த ஒன்றரை மாத லீவு நாட்கள்ல வீட்டுல வச்சு முறையாத் தண்ணீர் ஊற்றி பராமரிக்கணும். ஜூன் மாதாம் பள்ளிக்கூடத்துக்கு வந்ததும் அவரவர் மரக்கன்றுகளை பெஞ்சுகளில் அவரவர் பெயர் எழுதி ஒட்டியிருக்கும் இடத்துல அவரவர் மரக்கன்றுகளை வச்சிடணும். எத்தனை பேரோட மரக்கன்று உயரமாவும், செழுமையாவும் வளரந்திருக்கோ அத்தனை பேருக்கும் ஒரு பரிசுன்னு சொல்லியிருக்கோம். இந்த 100 மரக்கன்றுகள் வளர்க்குற பொறுப்பை எடுத்திருக்குற மாணவர்களின் வகுப்பாசிரியர், மூன்று நாளுக்கு ஒரு முறை மாணவரோட பெற்றோரின் போன் நம்பருக்கு போன் செய்து மாணவரிடம் பேசி, ’’தண்ணீர் ஊத்துனியா, கன்று எப்படி வளர்ந்துருக்குன்னு’’ கேட்பார்கள்.

7-ம்வகுப்பு மற்றும் 9-ம் வகுப்பு மாணவர்களிடம் இந்த லீவு நாட்கள்ல வீட்டுக்கு பக்கத்துல கிடைக்குற புங்கன், வேப்பமுத்து, வாதாங்கொட்டை, நாவல், கொடுக்காப்புளின்னு என்னென்ன விதைகள் கிடைக்குதோ அதை பாக்கெட் கவர்களில் மண்ணை நிரப்பி போட்டு முளைக்க வச்சு கொண்டுவரச் சொல்லியிருக்கோம். விதைபோட்டு வளர்த்துக் கொண்டுவரமுடியாதவர்கள் விதையைத் தேடி அலையாமல், கன்றுகளை வேரோட எடுத்து வளர்த்தும் கொண்டுவரலாம். இவர்களுக்கும் பரிசுன்னு சொல்லியிருக்கோம். லீவு நாட்கள்ல விளையாடினாலும் ஒரு மரக்கன்றை கொடுத்து முறையா தண்ணீர் ஊற்றி வளர்த்துடணும்னு சொல்லுறதுனால மாணவருக்கு ஒரு பொறுப்பு வந்துடும். ஜூன் மாசம் பள்ளிக்கூடம் ஆரம்பிச்சதும் அந்தந்த மரக்கன்றுகளை அந்தந்த மாணவர் கையாலயே குழி எடுத்து, நட்டு, பாத்தி கட்டி தினமும் தண்ணீர் ஊத்தி வளர்க்க சொல்லப்போறோம். அந்தந்த மரக்கன்றுக்கு அந்தந்த மாணவர் பெயரையே வைக்கப் போறோம்’.

இந்த பவுண்டேசன் மாணவர் மூலம் மரம்வளர்ப்பு திட்டத்தை மாவட்டத்துல முதல்ல எங்க பள்ளியில துவங்குறதுக்கு பள்ளியிலேயே மாடித்தோட்டம் போட்டு பராமரிச்சதும் ஒரு காரணம். ஆறு மாசத்துக்கு முன்னால விருதுநகர் ஜே.சி.ஐ அமைப்போட இணைந்து ‘என்பள்ளி என்தோட்டம்’’ங்குற திட்டத்தின் படி, கீரைகளை எப்படி வளர்க்குதுன்னு 11-ம் வகுப்பு மாணவர்கள் 80 பேருக்கு பள்ளியிலேயே பயிற்சி கொடுத்து, செடிகள் வளர்க்கும் 80 பைகளில் தென்னை நார்க்கழிவு, மண்புழு உரம், மட்கிய சாணவுரம் ஆகியவற்றைக் கலந்து மாணவர்கள் கையாலயே நிரப்பச் சொல்லி அதில் பொன்னாங்கன்னி, கரிசலாங்கண்ணி, பசலை, முளைக்கீரை ஆகிய நாலு வகையான கீரை விதைகளை விதை போட்டு தினமும் காலையில வகுப்புக்குள்ள போறதுக்கு முன்னாலயும், மாலையில வகுப்பைவிட்டு வீட்டுக்கு போகும் போதும் என ரெண்டு தடவை தண்ணீர் ஊற்றி வளர்த்தாங்க. ஸ்டூடன்ஸ் கையாலயே மண் நிரப்பி, விதை போடச்சொல்லி , தண்ணீர் ஊத்தச் சொல்லி அந்தந்த செடிகளுக்கு அந்தந்த மாணவர்கள்தான் பொறுப்புன்னு சொன்னதுனால, தான் விதைச்ச கீரைவிதையை நல்லா வளர்க்கணும்னு எல்லா மாணவர்களுமே நல்லா வளர்த்தாங்க. இதுல சில மாணவர்கள் வீட்டுல இருந்து மட்கிய சாணத்தைக் கொண்டு வந்து போட்டும் வளர்த்தாங்க. ’’தாம் விதைத்த விதை கீரைகளாக வளர்ந்து வருகிறது’’ என்ற சந்தோசமும், இயற்கை விவசாயத்தின் மீது ஆர்வமும் நம்பிக்கையும் வந்துச்சு, இதுல, சரியாக விதை வளராவிட்டா மாணவர்களுக்கு வருத்தம் வந்துடக்கூடாதுன்னு மீண்டும் விதை விதைக்க கூடுதலாக விதைகள் வச்சிருந்தோம். ஆனா, எல்லா விதைகளும் முளைச்சு மாணவர்களுக்கு நல்ல மகசூலை கொடுத்துச்சு.

கீரை விதைதூவிய, 35 முதல் 40 நாட்களில் முழுமையாக வளர்ந்து அறுவடை நிலைக்கு வந்ததும், அவரவர் பைகளில் வளர்த்த கீரைகளை அவரவர் கையாலயே அறுவடை செய்யச் சொன்னோம். அறுவடை செய்த கீரைகளை என்னாப்பா செய்யலாம்னு மாணவர்களிடமே கேட்டதும், ‘’சத்துணவு சாம்பார் குழம்புல போட்டு எல்லாருமே கீரைக்குழம்பா சாப்பிடலாம் சார்’’னு மாணவர்களே சொன்னதுதான் ஆசிரியர்கள் எல்லாருக்கும் சந்தோசத்தை ஏற்படுத்துச்சு.

மாணவர்களோட ஆசைப்படியே ஒரு நாளுக்கு 5 பேர் வீதம் அறுவடை செய்யச் சொல்லி ஒருநாள் விட்டு ஒருநாள் என்ற கணக்கில் 16 நாளுக்கு அறுவடை செய்து சத்துணவு சாம்பார் குழம்பில் சேர்த்து மாணவர்களுக்கு பரிமாறினோம். இந்த 16 நாளும் பள்ளிக்கூடத்துல கீரைசாம்பார்தான். காய்கறி விதைகளைக் கொடுத்தால் பறிப்புக்கு வர குறைந்தது 65 நாட்கள் ஆகும். மேலும், மாணவர்களுக்கு இயற்கை விவசாயத்தைப் பற்றி எளிதா புரிஞ்சுக்கணும்னுதான் 35 - 40 நாட்கள்ல பறிப்புக்கு வர்ற கீரைகளை விதைக்க சொன்னோம். இதுலயே இயற்கை விவசாயத்து மேல மாணவர்களுக்கு முழு நம்பிக்கை வந்துடுச்சு. இதே கீரைத்தோட்டத்தை திரும்பவும் ஜூன் மாதம் ஆரம்பிக்கப் போகிறோம். இந்த விசயம் எல்லாப் பள்ளிகளுக்கும் தெரிஞ்சு பின்பற்ற ஆரம்பிச்சாங்க.

’’ஒரு நல்ல மாணவனுக்கு அடையாளம் மரக்கன்று நடுவது மட்டுமல்ல.. அதை வளர்த்துக்காட்டுவது..’’ இதுதான் எல்லா மாணவரிடமும் ஆசிரியர்கள் அடிக்கடி சொல்லும் வரிகள். ஒவ்வொரு மாணவரும் ஒவ்வொரு வருடத்திலும் வீட்டில் ஒரு மரமும், பள்ளியில் ஒரு மரக்கன்றும் நட்டு பராமரித்தாலே போதும். வறட்சி ஓடிடும். பசுமை படர்ந்துவிடும் ’’ என்று சொன்னபடியே மாணவர்களிடம் ஒவ்வொரு மரக்கன்றையும் பத்திரமாக கொடுக்கத் தொடங்கினார்.

Published Date : 24-04-2017 11:02:02

தமிழில் வெளியான முதல் புத்தகத்தின் நகலைக் காணலாமா?
பல்சுவை

தமிழில் வெளியான முதல் புத்தகத்தின் நகலைக் காணலாமா?

Last Updated : 25-04-2017 10:26:41

- கே.ஜி.மணிகண்டன்

நூல்களின் கால இயந்திரத்தில் பயணிக்க ஆசைப்படுபவர்கள், கன்னிமாரா நூலகத்தில் நடந்து வரும் '500 ஆண்டுகள் பழைமை வாய்ந்த அரிய நூல்கள் கண்காட்சி'யில் கலந்துகொள்ளலாம். நம் வரலாற்றுடன், நூல்களின் பரிணாம வளர்ச்சியையும் காணும் வண்ணம், நூல்களை மலையாக அடுக்கி வைத்திருந்தார்கள்.

தமிழ், ஆங்கிலம், இந்தி  எனப் பல்வேறு மொழிகளைச் சார்ந்த நூல்கள் இந்த அரிய வகை நூல்கள் கண்காட்சியில் உள்ளன. தமிழில் வெளியான முதல் புத்தகத்தின் நகல் நம்மை வரவேற்கிறது. காந்தி பிறப்பதற்கு முன்பே இந்தியாவைப் பற்றி எழுதப்பட்ட புத்தகங்கள் கண்ணாடிப் பெட்டிகளில் இருந்துகொண்டு கதை சொல்கின்றன. பிரிட்டிஷ் மாணவர்கள் தமிழகத்தில் நடத்திய ஆய்வுக் கட்டுரைகள், அந்தக் காலத்திலேயே அழகாகத் தொகுக்கப்பட்டு புத்தகமாக வந்திருக்கிறது. ஆங்கிலேயர்களின் 'அரசு புகைப்படக்காரர்'களால் எடுக்கப்பட்ட அன்றைய இந்தியாவின் பல்வேறு புகைப்படங்கள், 'கறுப்பு வெள்ளை'ப் படங்களாக காலம் கடந்தும் நிற்கின்றன. 

புகைப்படம் எடுக்க முடியாத காலகட்டங்களில்... இந்தியாவில் இருந்த பறவைகள், விலங்குகள், மீன்கள் உள்ளிட்ட கடல்வாழ் உயிரினங்கள் ஓவியங்களாக வரையப்பட்டு தொகுப்பாக இருக்கிறது. ஓவியங்களோடு, ஒவ்வொரு உயிரினத்துக்கான விளக்கமும் கொடுக்கப்பட்டிருப்பது சிறப்பு. தவிர, அடிமை இந்தியாவில் ஆங்கிலேயர்களால் நடத்தப்பட்ட மக்கள்தொகைக் கணக்கெடுப்புகள் புத்தக வடிவில் இருக்கிறது. அஜந்தா, எல்லோரா குகைகளில் வரையப்பட்ட ஓவியங்கள் நம்மைப் பின்நோக்கிக் கடத்துகின்றன.

1781-ம் ஆண்டு தரங்கம்பாடியில் நிறுவப்பட்ட தமிழகத்தின் முதல் அச்சுக்கூடத்தில் பதிப்பிக்கப்பட்ட 'ஞானமுறமைகளின் விளக்கம்' கன்னிமாரா பொதுநூலகத்தில் இருக்கும் பழைமையான நூல்களில் ஒன்று. திருச்சபை வழக்கங்களை விளக்கும் இந்நூல், இந்தக் கண்காட்சியில் இடம்பெற்றிருக்கிறது. 1913-களில் தென்னிந்தியாவின் சிலை வடிவமைப்பாளர்களைப் பற்றிப் பேசும் புத்தகம் இருக்கிறது. இந்தியர்களின் கட்டடக்கலை பற்றிப் பேசும், 'இந்தியன் ஆர்கிடெக்சர்' புத்தகம் 1921-ல் வெளிவந்திருக்கிறது. இதுதவிர, டாவின்ஸியின் ஒட்டுமொத்த ஓவியங்களையும் உள்ளடக்கிய 'Leonardo da vinci - the complete paintings and drawings' புத்தகம் கண்காட்சியில் இருக்கிறது. 

தவிர, பண்டைய இந்தியாவின் நில அமைப்புகள், இயற்கை வளங்கள் குறித்த தொகுப்புகள், விலங்கியல், தாவரவியல் சார்ந்து வெளியான புத்தகங்களும் இருக்கிறது. 'மிலிட்டரி காஸ்ட்யூம்ஸ் ஆஃப் இந்தியா' என்ற புத்தகம், ராணுவ வீரர்களின் உடைகள் எப்படியெல்லாம் பரிணாமம் பெற்றது என்பதை விளக்கும் 'pigeons post' என்ற புத்தகம், இந்தியத் தபால் துறையின் பரிணாமங்களைக் கலர் கலர் படங்களில் விவரித்திருக்கிறது. ஓட்டத் தூதுவர்களாக இருந்த 'தபால்காரர்'கள் பயன்படுத்திய உடை, ஆயுதங்கள் எல்லாம் வாசிப்போடு சேர்ந்து பிரமிப்பையும் கொடுக்கிறது. 

பதினைந்து ரவுண்ட் டேபிள் போட்டு புத்தகங்களை வரிசையாக அடுக்கி வைத்திருக்கிறார்கள். ஒவ்வொரு புத்தகத்தின் வெளியே மட்டும் அட்டை போட்டு இருக்கிறார்கள். இதில், சில புத்தகங்கள் தொட்டாலே உதிரும் நிலையில் இருந்தாலும்... பெரிய மனசுக்காரர்களாக  அந்தப் புத்தகத்தைத் தொடவும், திருப்பிப்பார்த்து போட்டோ எடுக்கவும், ஏன் செல்ஃபி எடுக்கவுமே அனுமதிக்கிறார்கள்.  கண்காட்சியைப் பார்க்கப் பார்க்க... நம் தமிழ்நாட்டின் கடந்த கால சரித்திரத்தை, நிகழ்காலத்தில் நின்றபடியே அணு அணுவாகச் சுவைக்க முடிந்தது. ஆழ்கடலில் தேடித் தேர்ந்தெடுக்கப்பட்ட முத்துக்களாக இருந்தது இந்த அரிய நூல்கள். 

கன்னிமாரா நூலகத்தின் இயக்குநர் மீனாட்சி சுந்திரம், "ஒவ்வொரு ஆண்டும் உலக புத்தக தினத்தை முன்னிட்டுதான் இந்தக் கண்காட்சியை நடத்துகிறோம். இந்த ஆண்டும் பள்ளிக் கல்வித்துறை செயலாளர் அறிவுறுத்தலின்படி இந்தக் கண்காட்சி நடக்கிறது. எங்களிடம் அரிய நூல்கள்னு கிட்டத்தட்ட 25,000 நூல்களுக்கு மேல இருக்கிறது. அது அத்தனையும் வைக்க முடியாது என்பதால், அதில் தேர்ந்தெடுத்து 300 நூல்களை மட்டும் வைத்திருக்கிறோம். இந்த  நூல்களை, இந்தத் தலைமுறையினர் பார்க்க வேண்டும் என்பதுதான் முக்கிய நோக்கம். 

இந்த கண்காட்சியில் 1545-ம் ஆண்டு வெளியான நூல்கள் முதல் 1920-ம் ஆண்டு வெளியான நூல்கள் வரை வைத்திருக்கிறோம். 1808-ம் ஆண்டு வெளியான பைபிள். 1858-ம் ஆண்டு மதுரை, புதுக்கோட்டை போன்ற பகுதிகளில் எடுக்கப்பட்ட புகைப்படங்கள். சென்னை மாகாண வரலாறு, இந்திய வரலாறு, கல்வி வளர்ச்சி போன்ற நூல்களும் காட்சியில் வைக்கப்பட்டுள்ளன. ஏப்ரல் 23-ம் தேதி புத்தக தினம். அதில் இருந்து 29-ம் தேதி வரை கண்காட்சி நடத்தத் திட்டமிட்டு இருக்கிறோம். காலை 10.30 மணிமுதல் மாலை 5 மணி வரை இந்தக் கண்காட்சி நடக்கும். சென்னை மட்டும் இல்லாமல் பல ஊர்களில் இருந்தும் மக்கள் வந்து இந்தக் கண்காட்சியைப் பார்க்கவேண்டும்." எனத் தன் வேண்டுகோளையும் வைத்தார் மீனாட்சி சுந்தரம். 

பல அரிய நூல்களின் பக்கங்கள் உதிரும் நிலையில் உள்ளன. அதைக் கண்காட்சியில் பார்க்கும் பலரும் அவற்றைத் தொட்டுப்பார்க்கிறார்கள். புத்தகத்துக்கு அருகிலேயே ஊழியர்கள் நின்றாலும், பார்வையாளர்கள் நூல்களைப் புரட்டிப்பார்ப்பதும், புகைப்படம் எடுத்துக்கொள்வது, செல்ஃபி எடுப்பதுமாய் இருந்தார்கள். இவ்வளவு அரிய நூல்களை மக்கள் பார்வைக்கு வைப்பது பாராட்டுக்குரியது. வரும் வாசகர்களும் அதை உணர்ந்துகொண்டு, புரட்டிப்பார்க்கும்போதும்,  புகைப்படம் எடுக்கும்போதும் கவனமாகக் கையாள்வது மிக முக்கியம்! 

Published Date : 25-04-2017 08:56:27

"DEDICATED TO ALL MARRIED COUPLES"

திரு. கண்ணதாசன் அவர்களின் நெஞ்சுக்கு நிம்மதி என்ற புத்தகம் வாசித்திருக்கிறீர்களா..?

தகராறு இல்லாத குடும்பம் இல்லை..
வீட்டுக்கு வீடு வாசப் படி..
ஒவ்வொருவருக்கும் ஒவ்வொரு கவலை..
யானைக்கு தன் உடம்பைத் தூக்க முடியவில்லையே என்ற கவலை இருந்தால் அணிலுக்கு தன் உடம்பு இவ்வளவு சிறிதாக இருக்கிறதே என்ற கவலை..

ஏழைக்கு தொப்பையை நிறைப்பது கவலையென்றால்
பணக்காரருக்கு தொப்பையைக் குறைப்பது கவலை..

காதலித்து கல்யாணம் செய்தவரும் கட்டிலைப் பிரித்து போட்டதுண்டு
பெற்றோர் நிச்சயித்த திருமணத்திலும் பேரன்பு பெருக்கெடுப்பதுண்டு

அன்பிருந்தும் பணமிருந்தும் சந்ததி இல்லாத குடும்பங்களும் உண்டு
சந்ததி இருக்கும் குடும்பங்கள் சாப்பாட்டுக்கே கஷ்டபடுவதுண்டு

அமெரிக்காவில் பகல் என்றால் இந்தியாவில் இருட்டு
பிரச்சனை இல்லாத வாழ்க்கை எவருக்குமே இல்லை
ஆக அடுத்தவர் நன்றாக வாழ்வது போலவும் நாம் மட்டும் தான் கஷ்டப் படுவது போலவும் பிரமை வேண்டாம்

கணவர் வீட்டுக்கு வரும் போதே பிர்ச்சனையோடு வரக் கூடாது
மனைவியும் அவரை கேள்விகுறிகளோடே வர வேற்க கூடாது..

கணவர் எதையும் அடித்து சொல்ல கூடாது
மனைவி எதையும் இடித்து பேச கூடாது

"நீங்க வாங்கின காய்கறி மகா மட்டம் "என்று மனைவி சொன்னால்.."எந்த நாய் சொன்னது?" என்று கணவன் பதில் சொன்னால் தான் பிரச்சனை..தன் தவறை ஒத்துக் கொண்டு.."சரி இனி பார்த்து வாங்குகிறேன்" என்று சொல்லி விட்டால் முடிந்தது

"நீ செய்த சாப்பாடு சகிக்கலை" என்று கணவன் சொன்னால்..
"எனக்கு தெரிந்த லட்சணம் இவ்ளோதான் ..நீங்க உங்க அம்மா வீட்டுக்கு போய் சாப்பிடுங்க" என்று மனைவி பதில் சொன்னால் தான் பூகம்பம் ஆரம்பம்.."இன்னிக்கு உடம்பு முடில..நாளைக்கு நன்றாக சமைக்கிறேன்" என்று சொன்னால் அன்பு வெள்ளம் தான்...

மனைவி புது புடவை உடுத்தினால் ...."இந்த புடவை நன்றாக இருக்கு.. அழகா இருக்கே" என்று சொல்லணும்
கணவன் வெளியிலிருந்து வரும் போது" ஏன் இப்படி வியர்த்திருக்கிறது..எளச்சு போய்ட்டீங்களே" என்று அக்கறையோடு மனைவியும் விசாரிக்க வேண்டும்..

மனைவியைக் கணவன் "அம்மா" என்று அழைக்கணும்
கணவனை மனைவி "அப்பா" என்று அழைக்கணும்

தன் தாயை மனைவி நன்றாக நடத்தினால் கணவனுக்கு நிம்மதி
தன் தாய் வீட்டை கணவன் பெருமையாக கூறினால் மனைவிக்கு நிம்மதி

BedRoom இல் Board Room இல் பேசுவது போல் பேசக் கூடாது..கணக்கு பண்ணும் நேரத்தில் கணக்கு வழக்குகள் பேசக் கூடாது..

பகலில் நடக்கும் எந்த வாக்குவாதமும் அன்று இரவிற்குள்
சரி செய்யப் பட்டு சேர்ந்து விட வேண்டும்..

முக்கியமாக கணவனும் மனைவியும் சிந்திக்க வேண்டிய விஷயம்..வார்த்தைகளில் ஜாக்கிரதை

எள்ளைக் கொட்டினால் பொறுக்கி விடலாம்
சொல்லைக் கொட்டி விட்டால் பொறுக்க முடியாது

முள்ளால குத்தின காயம் ஆறிடும்
சொல்லால குத்தினா ஆறவே ஆறாது..

ஒருவரையொருவர் அனுசரித்து போனால் உலகையே தனக்குள் அடக்கி கொள்ள முடியும்

இரண்டு கைத் தட்டினால் தான் ஓசை என்பார்கள்..
ஒருவர் கோபம் கொள்ளும் போது இன்னொருவர் விட்டு கொடுக்க வேண்டும்..

"பெண்டாட்டி தானே சொல்லிவிட்டு போகிறாள் ".என்றும்.."கணவன் தானே ..பேசட்டும்" என்றும் விட்டுக் கொடுத்து விட்டால் உள்ளம் துடிக்காது..உடல் வலிக்காது..ஊர் சிரிக்காது..

வாழ்க இல்லறம் !